日月堂

Open Now

Now Closed

繼續係觀塘返工作坊搵食，今次同學仔就帶左我再走入啲，食台灣風味嘅好東西。餐廳佈置都充滿台灣氣息，水泥牆、木製枱凳，再加埋牆上嘅木牌佈置，好令人有人置台灣感覺。大熱天就當然先嚟兩杯解渴凍飲，我嘅鳳梨紅茶同埋同學仔嘅黑糖珍珠鮮奶，兩杯味道都唔錯，最重要係佢一啲都唔甜，所以密密飲多啲都冇咁邪惡。同學仔嘅紅燒牛肉麵，牛肉都好厚而且炆得好腍又夠入味，而且麵條夠彈牙口感唔錯。我嘅傳統豬腳便當，豬腳肉質嫩滑入味，而且又多肉，再配埋份量都唔少滷肉飯，真係好味又抵食。另外再加左兩份即叫即炸嘅小食，台式鹽酥酥炸魷魚，佢個炸粉又薄又脆，而且魷魚口感彈牙，絕對係忍唔到口要食完一條再一條。炸到金黃色嘅梅子地瓜條，每條都炸到脆卜卜，加埋有甘梅粉一齊食，甜甜地好惹味。