真味鮮廚 (Closed)

難得約到幾位好友食飯，當然揀一間包羅萬有咩都有得食嘅餐廳😆我哋去咗觀塘一間有得食雞煲、刺身、海鮮、打邊爐嘅酒樓，無限時不停係咁食，極之滿足～首先上菜嘅係雞煲，侍應即場幫忙炒呀炒，每人秒殺幾件雞件，雞肉都算嫩滑入味，然後刺身有三文魚、希靈魚、甜蝦、鮑魚、帶子同八爪魚，十分豐富～放入胡椒湯，我哋就可以開始打邊爐，海鮮拼盤好正，每人半隻龍蝦，一隻大元貝、蟶子、仲有龍躉、鱔片、海蝦，肉質相當新鮮～水餃好大隻好足餡，蝦滑食得出手打好爽好彈牙～唔夠飽仲可以無限叫火鍋配料，全場嘢飲任飲，$300左右食到咁多嘢性價比好高～