汀汀烤活魚 (Closed)

今日同朋友一行三人去到荃灣三坡坊既汀汀烤活魚，因朋友想當年小學既時候係附近讀，所以相當熟路。汀汀烤活魚呢個名有一排好似間唔中會聽講過，但印象唔系太深刻。魚缸海鮮唔多，唔系太夠派頭。雖然如其名應該系主打食魚，但系同行友人怕多骨，而且唔太喜歡魚類，所以選擇左花甲雞煲。火鍋配菜餐牌有兩頁，部份仲可以選擇半份/一份，整體價錢合理。點左個麻辣(小辣)花甲雞煲($198/半隻)，除了麻辣醬、花甲和雞之外，還有大量芹菜、芫茜、紅洋蔥、蒜頭等等。整體味道好香濃，醬汁味道亦辣得有層次；雞肉好入味，麻辣醬汁令到雞肉非常juicy，做得幾好；花甲新鮮，幾清甜。單睇呢個雞煲確實唔錯。鬼馬雙拼包括墨魚膠&蝦膠，脆卜卜就甘沾泰式辣醬食又得，放落雞煲煮幾秒亦得，幾香口幾好食。豚肉賣相唔錯，但味道冇咩突出既地方，特別系肉味唔夠香濃，一般般吧。當食完雞煲後加湯煮其他材料既時候，我地發覺湯底已經變到冇咩味(呢個系店方需要主動探討下既地方)，然而我地要求店方加返d醬汁增加味道，店方亦非常樂意，服務態度都唔錯。冰豆腐唔錯，煮完一段時間都冇散開，仲非常嫩滑，質感一流，仲幾香豆腐味添，可以一試。