芝加哥串燒酒場

睇Andy哥條片睇到流哂口水，好味嘅表情係呃唔到人，一試真係好好味。招牌雞皮墨魚滑卷已經超越咗串燒嘅水平，媲美居酒屋嘅創意料理。 一咬落去雞皮酥脆，墨魚滑爽彈得黎夠鮮，有齊油脂嘅甘香同海鮮嘅甜，點埋蜜糖有種燒烤嘅風味，冇得輸。孜然午餐肉接近5cm咁厚，值得一讚佢係優質嘅午餐肉唔會有粉感，表面燒得甘香仲灑左孜然粉，同自己煎相比係另一種風味。 不過真係好大件，兩個人share都夠。 燒尖椒同翠肉瓜都好新鮮，尤其鐘意尖椒辣辣地有椒香。即燒乳豬香脆有肉汁，做到西餐乳豬嘅水準，有少少骨都算啖啖肉。紙鷂雞皮好有心機咁將一整片雞皮張開，每個位都燒得好透，夠晒酥脆。燒茄子同預期一樣咁大塊，茄子軟滑有孜然香，非常抵食。 燒蟶子王夠鮮甜，配大量蔥同炸蒜好惹味。黑松露薯條炸得乾爽夠脆，難得食到尾都仲keep到脆，黑松露醬好濃郁，點少少已經好夠味。炸雞軟骨大大塊有咬口，脆皮有啲似鹽酥雞咁幾香。脆炸3.6牛乳卷有驚喜，鐘意個脆皮好薄，真正外脆內嫩，有奶味唔會好甜。