Chalet (Closed)

今日晚餐選上呢間位於荃灣, 走中高檔路線嘅西餐廳。餐廳除咗中間幾張檯係"貼地"之外, 其他全部係高檯, 其中一邊牆裝上projector, 呢個格局睇波一流啦。先嚟個小食！脆脆三角墨西哥片表面鋪上芝士, 烤熱後芝士溶化, 拎起隨即拉絲, 配上經典番茄莎莎醬、酸忌廉、牛油果醬就最夾。侍者捧上呢道菜時, 我眼裏就只有龍蝦。原隻澳洲龍蝦, 肉質肥厚彈牙, 加上混合咗蝦膏嘅醬汁, 味道更加濃郁豐腴, 令人回味。呢隻烤乳豬嫩滑肥美, 外皮香脆可口, 皮肉之間帶一層油脂, 入口油香豐盈。配菜有新鮮翠綠嘅法邊豆, 經輕輕烤熟, 爽脆鮮嫩。除咗法邊豆之外, 主角乳豬之下仲有薯蓉、酸菜, 很有風味。