金華燒臘大王 (Closed)

朋友近來轉工，大家都附近返，於是相約午一，由於唔想行得太遠，所以搵依間比較就腳燒臘鋪。今次係第一次幫襯，所以都係叫大路，我見佢聲稱叉燒馳名，而其他顧客唔少都係叫叉鵝飯，於是我同朋友都不約而同咁叫叉鵝飯，另外再加隻鹹蛋。朋友食得高級些少，叫一碟再加凍檸茶，我就一碗份量已經好足夠。食未上先講地方同服務，雖然間鋪裝修得幾靚，但地方其實好淺窄，無怪乎成日都排長龍。開頭我坐路口位，人行出行入都撞到，所以一等到卡位有人走我即刻轉位坐，但因為咁所以單好似又亂，所以雖然同樣叫叉鵝飯，兩份竟然差一大段時間先到。提到食物，叉燒好瘦，而且個汁太稀，所以口感麻麻，唔好誇口話馳名，即使同大集團燒臘比都仲有一段距離。燒鵝則較為理想，雖然肥瘦度唔算太平均，但整體講都唔錯。至於隻鹹蛋又係水準之下，不但冇出油，而且已經有啞色，仲要另外收錢真係有搵笨。總括講，以佢收費服務同品質，在在都難以同大型中式快餐店匹敵。