九州鯛魚 (Closed)

前日係西灣河補完習之後，就同朋友一齊諗住去太安樓食下啲嘢。點知經過附近見到呢一間新開嘅餐廳，所以就入咗去食啦！嗰日我哋大概8:00去到，兩個人每人嗌左一個定食，仲加咗一份小食，價錢都係大概$100一位，個人認為呢種質素同埋環境服務都已經好抵食！首先講吓呢個十和川牛肉飯定食，唔使$100就食到佢枱而上咁多嘢，真係好抵食！沙律菜非常新鮮，上面配左啲芝麻醬。溫泉蛋水準中上，沙律薯蓉好好食，唔會太流，而佢仲配左一碗鯛魚魚湯添！黃牛份量非常之多，味道同吉野家食到嗰啲餐好遠，唔會太咸。我朋友嗌咗呢一個吉列海老烏冬，淨係講佢吉列蝦嘅擺盤，已經加晒分！食落去啲蝦肉好新鮮，而且好彈牙，啲炸粉亦都唔會好油、好厚身。烏冬嘅湯底亦都係用鯛魚魚湯熬製而成嘅，朋友覺得可能有啲腥，但我飲落去就覺得非常之好飲，相信呢啲口味都係因人而異嘅！最後呢個蟹肉忌廉薯餅價錢偏貴，但係質素唔差！蟹肉同薯餅嘅比例啱啱好，而炸粉亦都唔會好厚身。