Chef's Stage Kitchen (愉景新城) (Closed)

今晚約咗朋友食飯，朋友介紹食呢間西餐，佢之前食過話質素好好，除咗嘢食好之外，服務態度都好好，我覺得除咗食食物嘅質素之外，態度都好緊要，另外商場仲有泊車優惠，所以特登過嚟試吓。可能我哋太早過嚟，所以暫時冇咩人，再加上係平日，但係真係坐得舒服啲，同埋上菜都好快。食物嘅價錢算平，喺商場入邊同埋氣氛唔錯，俾呢個價錢真係值得。頭盤叫咗個加拿大海膽帶子多士，帶子好鮮甜，海膽一樣好甜，完全冇苦味，入口即溶，一個好開胃嘅前菜。之後叫咗個墨魚汁鮮帶子海蝦扁意粉，墨魚汁配合芝士好濃味，最啱我呢啲芝士控，意粉很彈牙，海蝦同帶子兩邊煎到有少少脆口。之後叫咗個炭燒美國天然極黑厚切黑豬鞍扒，肉的質地好淋，冇諗過豬扒嘅肉質會咁易入口，表面有陣燒烤的香味，真係好好食。