本真東后齋 (Closed)

入到黎餐廳，見到一尊足7尺既觀音像，空間雖然唔算好闊落，燈光帶點泛黃，卻令人覺得氣氛好柔同平靜，妙！起菜先黎「杏汁菜膽炖榆耳湯」，一上枱已經聞到杏汁香味，傑身得黎唔會好漿，連埋入味既耳及白菜膽一齊食，口感同味道都比傳統杏汁豬肺湯更突出！至於小菜方面其實係二人餐分量，所以我地決定試齊「靈芝菇南瓜蒸百合、松露醬木耳秋葵炒淮山」、「鮮露筍百合炒野竹笙」同「蜜桃柚子骨」4碟小菜。其中我最愛既柚子骨，蜜桃汁酸酸甜甜，十分開胃，柚子骨其實係用腐皮包着蓮藕炸，咬落爽脆，味道一試難忘！唔好睇每碟得2人餐分量，其實飲埋湯都真係幾飽，最後仲有「松仁黑松露炒飯」。