意粉狂熱 (皇室堡) (Closed)

從來未寫過食評，但依間實在太伏，為免其他人中伏，專登要寫食評！今日突然好想食意粉，早幾日食開的餐廳未轉 lunch menu，於是就上 open rice 睇吓銅鑼灣仲有咩意粉餐廳，然後大熱天時由鵝頸橋行到嚟皇室堡揾上依間 Pastaholic。平日1點 Lunch time 嚟到，餐廳大約得一半滿座，都怕中伏但既然行咗咁遠，都費時轉場，唯有試吓。一場嚟到就試吓佢個自製意粉，揀咗「溫泉蛋蒜香蘑菇鮮製意粉」，配洋蔥湯同熱奶茶。落單時仕應聽完，單都無覆就行開去落單。上菜速度都唔錯嘅，好快就上咗個洋蔥湯，入面的洋蔥切成一粒粒，而唔係平時見開的切絲，味道偏鹹，不過我都飲晒。然後就到主角意粉，一嚟個賣相真係唔掂，但温泉蛋好細粒咁，蒜香亦唔太覺。食落去真係唔掂，首先又係鹹，蘑菇整得唔好食，好似就咁烚完再放落去咁。所謂的自製意粉亦一陣鹼味，碟底一堆水，最後只係格硬食得 3 份 1！真係去便利店叮個意粉都冇咁嬲。然後到熱奶茶，茶味比較淡，唉，成個 lunch 無樣掂！依間以後唔會再試，太失望！