波仔

Open Now

Now Closed

奧運接近尾聲，屋企嘅雪櫃存貨都差唔多耗盡，又係時間到「波仔」入貨，適逢暑假期間逢星期三買「波仔」產品有九折優惠，一於買多幾盒做儲備。雞沙嗲XO醬炒飯 :有兩串雞沙嗲，叮完都唔會好乾，炒飯夠乾身，XO醬味香濃，辣辣地食落相當惹味。星洲炒米 :叮嘅時候已經聞到陣陣咖哩香味，配料有蝦、叉燒絲、青椒、洋蔥等等，相當足料，香辣度十足，越食越開胃。水晶蝦餃 :一包有六粒，蝦餃皮唔會太厚，食落煙韌，蝦肉夠彈牙，作為宵夜小食一流。花生醬西多士 :真係估唔到西多士都可以有得叮，想更加好味嘅梗係要用氣炸鍋，入口外脆內軟，花生醬味濃郁，配埋牛油及糖漿食，真係好有茶餐廳風味。椰汁紫米露 :個人最喜歡嘅「波仔」甜品，椰汁味香濃，大大碗21蚊好抵食，每次嘅必買。