Cow Cow Café by 東京ミルクチーズ工場 (Closed)

同久違嘅朋友仔係旺角見面食餐飯，食完就係朗豪坊兜下。經過呢間日式甜品鋪，就想試下。其實之前一直都想試下，但都無食到。店內有唔少牛牛圖，一直好好奇佢啲雪糕係咪咁重牛奶味，終於可以一嚐佢嘅滋味。我點咗Affogato北海道牛奶雪糕配日式抹茶，而朋友就點咗草莓芭菲。印象中係自己去櫃台點餐，等店員叫號碼再自己拎甜品。Affogato北海道牛奶雪糕配日式抹茶＄48份量而言，雪糕唔算好多。而雪糕頂部有撒到少許抹茶粉，另外有一小壺抹茶供客人倒落雪糕。雪糕都幾有奶香， 口感夠香軟綿滑。而加上抹茶，味道都唔錯，唔會太苦澀，帶少許茶香。草莓芭菲＄66芭菲份量都唔算少，賣相都頗精緻。食落香甜可口，士多啤梨都幾新鮮。