池記 (Closed)

夜媽媽喺中環放學，近10點真係死城一個，冇乜好食。見池記未打烊，即管入去一試。之前總係覺得佢太貴，甚至比麥奀、麥文嘅更貴，所以都係無衝動入去食。嚟一間廣東麵家食嘢，基本盤一定要試返碗雲吞啦！自古以來，雲吞都係小食，所以包到細細粒一啖一粒最啱數，所以，沾仔所謂首創嘅乒乓波咁大嚿嘅雲吞，覺得始終都係gimmick居多，一啖食唔哂其實唔係咁鍾意。另外，其實包雲吞嘅形態度都好重要。包一粒雲吞總要留條尾，真係可以靚到好似一條金魚尾一樣，放湯時散開，真係好似欣賞緊條金魚游水一樣！池記絕對做到了，係我食過咁多間雲吞麵麵家之中，尾部形態最靚嘅，而並無之一。其他好多時唔係條尾太短，就係包嘅時候手心揸得太用力，將條尾撳實咗。可惜，用料方面比較遜色。蝦嘅size ok但肉質唔爽有d韌。雲吞並非全蝦雲吞，有10-20%豬肉左右，調味適中。驚喜之處係食到又少少大地魚乾加咗入去撈餡，散發那種獨特嘅香味；儘管如此，由於蝦嘅質地差，整體上令到成碗雲吞完全失色。正所謂色香如何好，總要靠味道！$50一碗真係完全唔值，試一次就夠，不會再有下次。