Video
Read full review
2024-11-12
0 views
又係過江龍店🐉。响日本某平台嘅評分有成 3.89，分數上係絕對係亮眼。其實我之前都有食過，不過成年前，唔太有印象，而且當時未開始寫食評，粗略印象當時係覺得麻麻地，但基於集郵心態，一於去多次，試下當時未試過嘅另一款拉麵。《粟國鹽味拉麵🍜》粟國本身我未聽過，search完先知係位於沖繩嘅一個島，我諗佢係想強調鹽嘅出產地。香味 (3/5) - 鹽本身係聞唔到的，大家都知道。如果食鹽拉麵，香味方面我會重視有冇一種顯著嘅基底同軸心，咁，佢嘅底味係來自鰹魚湯，都算好聞，其次有少少芝麻嘅香味。湯 (3/5) - 未講個湯好唔好味之前，我想先講，據一本講拉麵歷史嘅書所記載，多賀野呢間店係標榜佢地係冇用味精，又稱為”無化調”味型。冇左味精嘅加持，旨味（うまみ umami），即鮮味，就要靠食材本身去呈現。咁無加味精對我來講就冇話一定係好，因為就算加，加得高明，食完身體冇唔舒服嘅話其實又有乜所謂呢。講返正題，個湯嘅味道主要係來自鰹魚湯，我食唔出雞骨或豬骨湯本身嘅鮮味，蔬菜味唔明顯，粟國鹽係咪可以單天保至尊我又認為未至於。從湯嘅色澤，味道，䶢度，同芝麻帶出來嘅風味來講，我認為都算係正常水準，唔好唔壞，但一定唔
《粟國鹽味拉麵🍜》
粟國鹽味拉麵🍜
$128
0 views
0 likes
0 comments
粟國本身我未聽過，search完先知係位於沖繩嘅一個島，我諗佢係想強調鹽嘅出產地。
香味 (3/5) - 鹽本身係聞唔到的，大家都知道。如果食鹽拉麵，香味方面我會重視有冇一種顯著嘅基底同軸心，咁，佢嘅底味係來自鰹魚湯，都算好聞，其次有少少芝麻嘅香味。
湯 (3/5) - 未講個湯好唔好味之前，我想先講，據一本講拉麵歷史嘅書所記載，多賀野呢間店係標榜佢地係冇用味精，又稱為”無化調”味型。冇左味精嘅加持，旨味（うまみ umami），即鮮味，就要靠食材本身去呈現。咁無加味精對我來講就冇話一定係好，因為就算加，加得高明，食完身體冇唔舒服嘅話其實又有乜所謂呢。
講返正題，個湯嘅味道主要係來自鰹魚湯，我食唔出雞骨或豬骨湯本身嘅鮮味，蔬菜味唔明顯，粟國鹽係咪可以單天保至尊我又認為未至於。從湯嘅色澤，味道，䶢度，同芝麻帶出來嘅風味來講，我認為都算係正常水準，唔好唔壞，但一定唔係驚艷級數。
麵條 (4/5) - 麵方面係有驚喜，佢係用中細麵，有加全粒小麥粉，麵味充足，驚艷到我嘅係麵條非常的爽口，我認為非常唔錯。
配料 (2.5/5) - 豬叉燒係用豬五花，腩肉來講佢算瘦。可惜肉質偏硬，冇足夠肉味，麻麻地。
荀方面，算粗，口感算爽脆，荀味清甜，幾好。
溏心蛋方面，我認為有入味，有蛋香，不過偏熟左少少，普通啦。
蔥方面，佢係橫切，而唔係切條，唔夠有心機。
另外一提，除左碗麵本身我認為麻麻地之外，有一樣野我係比較唔滿意，就係個燈光。成間店都偏暗，而所有位都冇刻意加盞燈去照明，令到影相偏暗，光用肉眼睇都覺得睇得唔夠清楚，連d麵有用全粒小麥粉我都係睇相先察覺到。單單係影相唔靚，响而家d名店 setting 來講非常蝕底，成件事變得唔 IGable.
另外想講講個調味架，一般來講，好多拉麵店嘅 bar 枱位都係每張個位有一 set，而咁啱我個位係冇的，要開口問先有。而，d調味料之一，係選用左七味粉，我認為有心思嘅拉麵店應該係要用一味粉，因為七味粉除左辣味，仲有其他味道，會容易破壞個味道平衡。我正正加左七味粉之後，我就覺得味道失衡，但可能係我重手左都唔定。
值得一讚係，調味架上個醬油，佢有貫徹”無化調”嘅宗旨，選用左食唔出有加味精嘅醬油，雖然個湯本身夠鹹，但我都刻意額外試左幾滴個醬油去核實呢件事，所以都值得一提。
最後，我都係清晒。順帶一提，個碗嘅設計同一蘭有類似嘅點子，碗底有一句意思類近嘅句子，大概都係話：最後一滴湯令人超滿足。不過，一蘭係比到呢個感覺我，呢道就講真冇。
整體 - 不推介。
Other Info. :
我比服務滿分，因為店員係有殷勸地招呼我，有求必應。縱使間店嘅運作有缺點，例如冇 QR code 落單，埋單要叫人來埋而唔係出去櫃檯（比較慢），同我以上提到，我個位冇調味架，全間店偏暗，全部都唔關店員事，都係店長或總公司嘅問題。
(The above review is the personal opinion of a user which does not represent OpenRice's point of view.)
Post
