鬼金棒

Open Now

Now Closed

週四傍晚與表妹啤咗個幾鐘頭歡樂時光後，兩口子就去咗附近一家新開嘅拉麵店「鬼金棒」度醫肚。日本過江龍雖以辣為名，但「鬼門」外嘅辣牌上清楚道出拉麵其實係可選「無辣」及「無麻」嘅。店內樑上排滿大大小小嘅鬼面具，桌上亦擺出可愛嘅鬼公仔作裝飾，相當吻合店名。店子前方右手邊位置為開放式廚房，大約有十個吧位圍繞著。由於六點半左右已經八成滿座，兩口子就被安排坐較入嘅合併式散座。餐桌上有自助筷子、紙巾、調味料及清水，齊備潔淨。電子落單環保簡易。點好菜，妹妹仔迅即一人派發一條圍裙，十分衛生。並為兩個酒鬼送上凍啤！小肥點咗碗無辣無麻嘅「芫荽麻辣味噌拉麵」（$110）。如相所示，橫影掂影主材芫荽都成座山咁高，芫荽實屬勁量級！芳香嘅芫荽山下藏有清新爽脆嘅芽菜。厚厚嘅五花腩層次分明，而且入哂味。拉麵麵條粗身得黎煙韌彈牙。「鬼金棒」環境簡潔企理，年輕嘅服務生友善有耐性，「芫荽麻辣味噌拉麵」嘅芫荽山賣相不單夠哂震撼，拉麵亦量足飽肚，如果可以有埋日本生啤飲就更加理想啦！