早安越南 (Closed)

喺黃埔睇完戲，所以想喺黃埔新天地搵餐廳食晚飯，見到呢間新開嘅早安越南，價錢唔貴，所以一試。我地每人叫左一個set，分別係生牛肉湯河，青咖喱雞扒飯，配咸檸可樂同檸檬柚子蜜。另外仲叫咗一個蛋黃黃咖喱軟殼蟹。食越南嘢食當然要食生牛肉湯河啦，湯底清甜有肉味，河粉唔散，不錯！青咖喱雞扒飯幾驚喜，青咖喱味道濃郁少辣，雞扒煎得香脆可口，令人胃口大開！不過最驚喜一定係蛋黃黃咖喱軟殼蟹，估唔到軟殼蟹總共有三隻咁多，而且有法包浸左落黃咖喱入面。雖然黃咖喱味道好重，但係食得出蛋黃嘅味道，非常驚喜，絕對值得一試！餐廳裝飾有風格，而且用嘅杯具都印上左圖案，可見用心！喺香港以平價位食到呢個質素嘅越南菜，絕對驚喜！