Video
Read full review
2010-06-29
37 views
之前介紹過嘅九龍城海鮮火鍋，好多朋友去話都讚好，但最弊地點真係唔太就腳。今次介紹位於尖沙咀山林道嘅高流灣海鮮火鍋，同樣以新鮮海鮮靚料取勝，味道品質有保証，地點仲唔會話偏僻添...強烈推介！湯底呢度選擇都有十幾款，因為唔想咁熱氣，所以叫左呢清潤海底椰鍋底($58)，果然夠清甜，湯入面嘅雞腳同粟米仲幾好味添。下次有機會再黎就試埋佢個有海參火腿花膠海螺嘅招牌湯底($138)先至得...水上飄飄($88) - 用靚海蝦滑釀入去魚肚入面，上面仲有好多新鮮脆卜卜嘅蟹籽，放湯滾分幾鐘就食得，唔係度度有得食，必試！極品手切雪花肥牛(例牌$98) - 牛肉雪花紋都夠靚，合理價錢應有水準，人多的話可以加多$50要份大嘅...限量版手切肥牛粒(例牌$98) - 呢個滾果陣要比雪花肥牛耐少少，肥牛粒油脂豐腴，食落肉味濃郁，唔駛蘸任何醬料都已經覺得好正～推介！至尊手切本地牛脊(例牌$108) - 之前兩個牛又"極品"又"限量"，跟住仲要黎多個"至尊"，聽落真係好似幾勁咁，不過我嫌呢個較硬身，肉味亦無肥牛粒咁出，感覺麻麻...冰島蟶子王(時價)- 蟶子本身唔駛滾太耐就食得，一食落去真係驚喜爆燈，絕對係超級鮮甜爽口
湯底呢度選擇都有十幾款，因為唔想咁熱氣，所以叫左呢清潤海底椰鍋底($58)，果然夠清甜，湯入面嘅雞腳同粟米仲幾好味添。下次有機會再黎就試埋佢個有海參火腿花膠海螺嘅招牌湯底($138)先至得...
水上飄飄($88) - 用靚海蝦滑釀入去魚肚入面，上面仲有好多新鮮脆卜卜嘅蟹籽，放湯滾分幾鐘就食得，唔係度度有得食，必試！
極品手切雪花肥牛(例牌$98) - 牛肉雪花紋都夠靚，合理價錢應有水準，人多的話可以加多$50要份大嘅...
限量版手切肥牛粒(例牌$98) - 呢個滾果陣要比雪花肥牛耐少少，肥牛粒油脂豐腴，食落肉味濃郁，唔駛蘸任何醬料都已經覺得好正～推介！
至尊手切本地牛脊(例牌$108) - 之前兩個牛又"極品"又"限量"，跟住仲要黎多個"至尊"，聽落真係好似幾勁咁，不過我嫌呢個較硬身，肉味亦無肥牛粒咁出，感覺麻麻...
冰島蟶子王(時價)- 蟶子本身唔駛滾太耐就食得，一食落去真係驚喜爆燈，絕對係超級鮮甜爽口，以後每次黎都必定要叫！推介！
美國桶蠔($98) - 平心而論，呢碟蠔嘅賣相真係麻麻地，望落亦唔係漲卜卜好肥美果隻，不過食落口又真係令人回事...原來蠔味十足，鮮味無比，真係失敬晒～
鮮甜桂花蚌($78) - 餐牌上真係有"鮮甜"呢兩個字，食落去亦真係有"鮮甜"呢個感覺。唔係誇張，呢度嘅桂花蚌係我食過最好食嘅，只係大家諗極都唔明點解可以"鮮甜"得咁緊要?
鱆紅魚刺身(例牌$128) - 活魚刺身係呢度嘅名物之一，原條($368)食唔晒，所以叫左例牌。份量以價錢計都算合理。魚身切得厚薄啱啱好，絕對令味蕾得到最佳活魚刺身體驗...食刺身都一定會有Wasabi同日本豉油你去蘸，但黎到呢度就一定要試下破傳統，蘸呢隻酸辣汁。呢隻汁其實同泰式生蝦刺身果隻汁一樣，估唔到用黎配鱆紅魚刺身係咁鬼好味～又學多樣野了！
鎮店九嬸墨魚丸($78) - 78蚊9粒墨魚丸其實真係幾貴，但既然講到係鎮店之寶，仲話係限量供應，點都要試一次...試完感覺係點？就係八個字 : 彈牙爽口，墨魚味濃！
嘩鬼蝦條($58) - 外型上同正話果個水上飄飄有啲相似，入面同樣係鮮味到爆嘅海蝦滑，而出面包住嘅就係油炸鬼，侍應話將蟹籽果邊向上先放入湯，滾分幾鐘就食得～好味呀！
冰豆腐($58) - 無花無假，真係每一舊豆腐都仲有啲冰喺上面，不過味道真係一般，始終唔夠一層層嘅台式豆腐打邊爐咁好味，不過呢度只有一種豆腐，想食就別無他選...
菰類拼盤($58) - 加加埋埋都有7-8種菰，差唔多大路講得出嘅都有，我只係試左冬菰同埋金菰菜，配埋個湯底都幾好味，呢個價錢都食得過...
呢度除左食火鍋之外，亦有唔少吸引嘅小菜可供選擇，好似呢個椒鹽大尾魷魚鬚($68)，絕對係佐酒一流惹味首選；另外仲有清蒸墨魚丸同埋海膽炒蛋...真係諗起都流晒口水~正呀！
高流灣海鮮火鍋論價錢論質素，絕對係值得推介，而且款式仲有好多選擇，最啱奄尖又為食嘅香港人。不過呢度啲伙記成日都心不在焉咁，又無乜笑容，如果可以改善下就應該會更旺場...
Post
