Sawadee Chef

Open Now

Now Closed

Sawadee Chef係奧海城入面一間靚裝泰菜店，之前經過見倒已經覺得環境好靚好吸引，周末就特登黎試下。店面非常大，以木色做主調，加上陽光從一整排落地玻璃照入黎，非常明亮寫意。圖案碟子令成個用餐體驗都更加賞心悅目。因為係weekend，所以中午都只有散叫，佢地嘅menu都好多款揀，小食、燒烤、海鮮、蔬菜、飯麵同甜品都有。泰式船麵($138) - 船麵present得幾靚，湯頭夠晒濃郁惹味，金邊粉食落少少彈口唔會痴埋一舊，入面仲有豬肉丸、豬膶、豬肉餅同炸魚皮。招牌海南雞飯($188) - 海南雞飯份量對版，雞件已經去左骨，食得方便，肉質幾滑，蘸埋薑蓉、酸辣汁同黑豉油食更為滋味，雞湯都好濃雞香味，只係略嫌黃薑飯淋左少少。芒果糯米飯($108) - 糯米飯整到好似壽司咁，細細舊，上面放左芒果同椰漿，賣相幾精緻。糯米飯口感軟糯，芒果亦唔會太酸，如果多啲椰漿仲正！總結，食物唔錯，賣相都好精緻，不過定價就略為進取，建議可以喺openrice買佢嘅coupon，會有九折抵啲。