西餐大排檔 (Closed)

聽到餐廳名就以為佢同普通大排擋一樣？咁就錯啦，呢度嘅環境係偏向Cafe類型既西餐廳，座位比較闊落，坐得舒服！精選午餐都好豐富，包括沙律、主菜、餐飲、餐湯，同一個甜品。午餐嘅沙律係日式青瓜蟹子沙律，叫日式係因為沙律用咗腐皮泥包住啲，甜甜嘅腐皮同清新嘅青瓜好夾，食落唔會過甜。食精選午餐仲可以以優惠價，加48蚊，食埋個海鮮拼盤，生蠔、鮑魚、鮮蝦、日式刺身帶子、聖子刺身，特製嘅香草醬，帶出生蠔嘅鮮味，清新口味；而刺身就有蜜糖芥末醬，食落鮮甜；鮑魚大大粒；鮮蝦就爽口彈牙。整個拼盤都好抵食！主菜就係香焗智利深海鱈魚配鮮蜆汁，鱈魚配合香煎嘅小蕃茄同荷蘭豆上碟，紅、綠、白色三色嘅配合大大提升視覺效果，睇見都想食。鱈魚新鮮鮮甜，肉質鮮嫩，煮得岩岩好，魚皮位置微煎，好香口。薯蓉內含薯仔粒，提升口感。橡皮級黑毛豬肉眼蓋，同魚一樣，用咗又紅又綠嘅配搭，黑毛豬肉眼蓋肉質比較結實，配合埋特製醬汁，帶出咗新鮮嘅肉味。甜品係芒果楊枝甘露，有濃郁嘅芒果味，西米粒粒增加咗口感，為整個午餐作一個完美嘅結尾。