Wheatfield X 羅宋湯專門店 (Closed)

今日係中環中心開會開到2點半先走得，非常餓，行到祖庇利街見到間餐廳裝修非常特別，成條隧道咁，叫wheatfield x, 應該跟銅鑼灣間麥田廚房有關，係就非常好，事關佢既羅宋湯非常好飲，一飲就停唔到口。入去坐低之後，一看menu, 真係同麥田廚房一樣主打羅宋湯，又有我至愛既秘制雞翼，但呢間就好似麥田廚房快餐版。 張menu好似車仔麵做法，例如可以揀羅宋湯配上海麵或拉麵，再加小食等，剔完再交比waitor。我梗係揀羅宋湯再配上海麵，再加秘制雞翼及凍檸茶。羅宋湯真係好正，湯底濃再加上軟腍腍既牛腩，而家再加上海麵食簡直係絕配，我差不多是一口氣食晒，雞翼亦冇令我失望，皮脆肉嫩，好明顯選食材同煮功都好用心，如果選擇多少少會更好。其實我想再點其他食物，好想試下俄式清雞湯加拉麵，因為趕時間下星期一定再來試。絕對值得推介。