草民 (Closed)

Cafe開到成行成市，要突圍而出除咗要食物質素高，裝修、食物是否打卡able都係重要元素。草民嘅特色就係環境舒服，以木系顏色同假草皮塑造一種自然輕鬆嘅感覺。佢哋嘅食物賣相都好好，就好似脆爆草地滾球咁，以抹茶嘅餅碎扮草地，隨朱古力波波附上一枝木鎚，扑開之後有球雪糕、牛奶朱古力同埋有酒味嘅啫喱，加埋碟上嘅爆炸糖口感好豐富。紫薯鮮奶上有隻可愛吉祥物，飲落有啖啖紫薯蓉，好香甜好飲。意大利飯咖哩味唔算太重，飯有cream 香亦無中咁咁膩，不過蟹肉份量偏少；雞翼好少孜然味但係的確好香辣。總括嚟講晚市唔算平，食物份量偏細比較適合雀仔胃嘅女生，但個紫薯鮮奶同埋環境用心程度都值得一讚！