丼吉日式吉列豬排專門店 (The ONE)

Open Now

Now Closed

丼吉算係我多年支持既食店之一，每年總會幫襯到3-4次。就算去到唔同分店，佢地個吉列都可以keep 到水準，十分讚。⭐️⭐️⭐️⭐️⭐️今次放工約左一班同事聚餐，選擇左THE ONE 呢間分店，由於book 左枱，預留左卡位俾我地。座位非常闊，坐滿6個人都唔覺迫挾。👍睇完MENU, 大家都心大心細唔知點揀，店員就建議我地叫2個3人set, 呢個set 包括有豬柳，豬扒，蝦，蠔，所以絕對夠3個人食。其實計落都好抵食，一次過食到4款招牌食物。當然仲有前菜，麵豉湯，椰菜絲同白飯（任加）。🐖🦐🥢丼吉最出名係唔油膩，炸粉非常薄，所以唔會好熱氣。豬柳豬排係鎮店之寶，一定唔會令大家失望，另外蝦同蠔都極之出色，吉列蝦好大隻，有成隻手掌咁大，吉列蠔應該係用上廣島蠔，再次要讚下個炸粉控制非常好。飯後店員會主動換上一杯熱茶☕️及西瓜🍉（消暑），食完大家都捧住個肚離開。