南대門3號

Open Now

Now Closed

同朋友行下尖沙咀，行到附近入咗韓國街，想食下韓國嘢！見到其中一間小店，有韓國人店員，價錢又親民，二話不說就坐低！小店分兩邊，一邊韓燒，另一邊食韓國料理。下午茶lunch time關係，揀咗幾樣嘢。寫低想食咩落張紙仔度，店員就會幫你落單。//海鮮煎餅//非常足料大份，兩個人仔食唔晒。煎餅好薄身，師傅將佢剪到好香脆，另外有少少芝麻，所以更加香口。如果鍾意食辣嘅朋友可以試吓泡菜味應該相信更加好食。//海鮮豆腐鍋//天氣凍，就更加想食鍋，上枱嘅時候熱辣辣，個人都即刻暖啲。入邊嘅海鮮好足料有蝦蜆，但係我最鍾意嘅都係件豆腐！香濃嘅豆腐味，加上奶奶地嘅泡菜，就好似食咗個小型嘅邊爐咁！同朋友講笑，食齋嘅話，泡菜同豆腐一定係首選，絕對係減肥恩物。//飯卷//叫得韓國嘢，一定會食飯卷！初初諗住兩個人一定食得晒，點知牛肉飯卷都係大大碟。入邊有青瓜 黃瓜 紅蘿蔔 雞蛋同埋腸仔，紫菜帶有麻油香，味道非常勁似屋企自家整☺️。兩個人食到飽飽，埋單都唔使$350元，呢個價錢食到韓國嘢，都算係幾抵。