首首.韓式小館 (Closed)

堅韓國廚師做嘅菜有咩特色，呢日食午餐發現佢用嘅豆醬，味道好住家 feel，同以往食過嘅有明顯分別；其次係白飯，餐牌寫明選用仁川白米飯，食落唔糊口，有彈性；論賣相，整體感覺夠養眼，特別係韓國山野菜拌飯配自家秘製大醬，一出場就搞到個個爭住影相。講唔出呢個素食餐包咗邊五款菜，淨係知道將菰、瓜同香葉撈埋個黃色大醬一齊食，好啱送飯，貌似豆泥嘅大醬，味道中性，唔勁喊亦唔超甜。最精彩係排喺隻碟最前方嘅香菜，全靠佢陣獨特香氣，豐富晒成個餐。如果冇咗佢，呢個餐會失去靈魂。食肉獸之選有韓式牛肉炒鮮菰，牛肉帶少少脂肪，冇肥牛咁肥，油量唔多，多啲菰仲好。戒牛族不妨食傳統豆醬海鮮湯，初見貌不驚人，用筷子玩撈起，蜆仔、蝦、豆腐、魷魚等配菜慢慢蒲頭，材料好豐富。豆醬味平實，湯頭清香，鮮中帶甜，油膩度為零，食晒連湯都飲埋絕對冇罪疚感。每款午餐都跟餐湯同三款前菜。餐枱空間有限下，店員上菜份外小心，佢哋服務非常勤快兼有禮，讚。