Kim's Bowl (花園道) (Closed)

最近返工成日要開OT，真係覺得自己好慘啊！不過唔開心開OT嘅同時，我亦會識得去安慰下自己同靠賞下自己。對於我嚟講最簡單嘅方法，就係買返餐好食嘅晚餐喇。喺我公司附近，就有間人氣極高嘅韓國菜連鎖店。依間餐廳其實成日都見到，特別係一啲辦公室嘅附近，所以我都聽唔少打工朋友食過，評價都唔錯。尋日見到有個同事，OT時買咗盒飯，賣相靚靚仔仔，噉我就試一試啦。夜晚黑，梗係要食飯先飽肚。呢度有唔少韓式便當可以選擇，我就要咗個泡菜豬肉便當啦。成個飯盒設計好有間隔，望落去整整齊齊，就更加吸引喇。泡菜豬肉份量唔少，而且有啲辣，配住啲白飯食就更加岩啦。除咗泡菜豬肉，估唔到有我最鍾意食嘅炒粉絲。雖然炒得有少少油，但都保持到彈牙質感，而且亦有黑豆同前菜，感覺好豐富。由於個飯辣辣地，當然唔少得要飲番杯嘢啦，我仲買咗一杯濟州青橘子特飲，入面有好多雜莓，仲有士多啤梨，感覺上好清新。由於唔知今晚要做到幾多點，我仲買多咗個素食嘅韓式飯卷，呢個飯嘅紅色嘅，入邊有好多蔬菜，感覺上應該會好受OL鍾意，因為食完都唔會Heavy喎。