炑八韓烤 (青衣城1)

Open Now

Now Closed

韓燒界入面，炑八係我近期最愛，之前去完佢既親子餐廳覺得好正，今次唔帶小朋友，再黎佢青衣分店食，呢度坐得舒服食完冇油煙，抽風系統做得幾好。我叫左個醬油蝦配紫菜飯，隊友就叫左炒芝士年糕拉麵，另外再叫左燒肉豬同牛。我最鍾意食呢度既爐邊蛋，芝士粟米同前菜，由其係泡菜，醃得好好味，芝士粟米燒到燶燶地脆口惹味，攞黎包肉嗰啲菜又新鮮又靚，重點係無限添！特級牛肋骨-牛肋骨醃好咗，另外再有一隻大紅蝦，南瓜同菇，調味剛剛好，唔使再點其他調味料。隻蝦燒到啲殼脆脆地既時候勁香勁惹味。原味牛舌-牛舌都靚，輕輕燒下就食得。炑八厚切五花腩-店員提我地如果燒五花腩記得叫佢地換左鐵板，咁樣會好燒啲，唔會俾啲豬油搶火，舊肉好靚，一層一層肥瘦均勻。韓國醬油蝦配紫菜飯-啲蝦又大隻又多膏，鮮甜，撈飯一流，如果多啲紫菜會更加好，同埋個碗大就會好撈啲。炒芝士年糕拉麵-呢個要快快撈左佢然後襯熱食，精粹係個汁，又唔會太酸太辣。馬格利生米酒-食韓式燒肉必飲，米酒香甜易入口，裝酒既碗仲勁有feel。