海陸空

Open Now

Now Closed

俾呢間韓國餐廳個名「海陸空」吸引左，所以同老婆黎呢間韓國餐廳食下韓國美食。一入黎就有韓國人黎招呼我地，好似去左韓國咁🤣我地叫左烤肉套餐、韓式海鮮辣麵同埋韓式芝士煎蛋卷。韓式芝士煎蛋卷賣相好吸引，食落味道都好正。芝士蛋卷當然有厚厚嘅蛋，蛋卷都好滑唔會煎得好老。蛋卷包上濃香芝士，好好味。食韓國野一定要試下辣麵。我地叫左韓式海鮮辣麵，海鮮有魷魚、青口同半隻蟹。呢度嘅辣麵非常辣，食到出哂汗，非常適合冬天嘅時候食。海鮮就幾好，無煮得過左火。黎到重點嘅烤肉套餐，呢個套餐有兩件羊扒、一塊五花肉、1++嘅韓牛同埋不同蔬菜。首先會有位韓國侍應簡單介紹下套餐嘅內容，之後就開始幫我地燒韓牛同蔬菜先，完全唔需要自己煮。當然一定要先試試件韓牛，韓牛好淋好滑，肉味濃濃，非常好食，我地都忍唔住係咁食。侍應見我地食完韓牛，就幫我地燒五花肉同羊扒，五花肉肥瘦適中，油份都幾多，好好味。羊扒唔會有好濃烈嘅臊味，非常好。呢個套餐非常抵食。