嘉豪酒家 (Closed)

上星期六與老爸及弟弟到此飲茶, 去到時人多要搭檯, 一張細檯分ABC 三張單, 坐咗6個人。點心都叫上得快, 我地叫了燒賣、蒸粉卷、叉燒包, 味道一般, 反而那碟煎虎皮椒, 卻有點意外的好食, 好惹味。跟住搭檯的食客相繼走咗。原本有一個會來的家人, 臨時有事來不到, 咁埋單時叫侍應減返一個茶位, 個侍應話要經理先減得。跟住嚟咗個男經理, 好兇的話冇得減, 同佢理論, 個經理就破口大罵我地, 話我地罷住張檯, 冇得俾人搭檯, 食幾個鐘, 食飽依家走人又話要減返個茶位, 態度非常惡劣….我地之前也是搭檯坐…客人走咗佢地唔再入客搭我地檯, 關我地咩事? 食飽埋單走, 講返事實人數, 又有咩問題? 我飲咗幾十年茶, 邊有唔減得茶位架!之前有一次, 又係佢, 我地叫咗點心好耐, 追極唔嚟, 而要趕時間走, 梗係埋單取消喇, 佢又係一路埋單一路鬧!我估佢係見我地一老一弱一個女人仔, 就「蝦」我地…….我地唔係俾唔起果幾蚊茶錢, 而係俾佢咁多次無禮對待。今時今日, 以客為先, 竟然仲有d 咁差的服務, 覺得不能不公諸於世, 寫出來, 都係想佢地正視問題, 作出改善。