Kuro Shabu (Closed)

朋友搵到份新工，就話要同我一齊食餐好嘅去慶祝下。揀來揀去，最終決定食我地無試過嘅高級日式火鍋。Kuro Shabu係中上環一帶，所以見到來呢度食晚飯嘅都有好多白領，呢度環境簡約舒適，中間有開放式廚房，可以睇到師傅預備食材。呢度嘅食物款式貴精不貴多，以牛、豬為主，而每個鍋亦會配菇同菜。我地坐係中間圍住廚房嘅圓檯，睇住師傅將一舊舊牛肉切片首先係A4黑毛和牛特選三款不同部位嘅A4和牛，食嘅時候可以較清楚嚐到不同部位嘅和牛嘅肉質分別，或軟或韌，口感一流！店鋪裡面仲有自家制作嘅麻醬同柚子醋，配以優質和牛，味道更正！之後到重頭戲，就係Omakase Set，師傅安排嘅係A5和牛。師傅建議我地將和牛放落鍋度淥2-3秒，淥到五成熟，而且仲講究進食嘅次序，首先係上肩肿肉，然後肋肉眼，最後西冷，咁樣先最能夠嚐到牛肉嘅不同質感同鮮味。A5和牛一入口，果然嫩滑無比，完全係入口即融嘅感覺，係日式火鍋必食之選！除左和牛之外，仲有食到黑薩摩鳥雞肉同黑豚肉，都十分優質，值得一試！轉配嘅稻庭烏冬彈牙爽口！最後甜品有一個抹茶雪糕，茶味非常濃郁！