高木炭火鳥燒 (Closed)

棉登徑少少隱蔽，但勝在多好西！Lunch Set前菜有牛蒡、味噌湯，味噌湯有大大嚿豆卜！第一個set係鰻魚飯，不得不賺，燒得真係好靚，見到即刻食指大動！味道都非常好食，微微焦香味既燒汁，加上鰻魚香，忍唔住大啖大啖咁撈飯食！朋友叫既係滑蛋豬扒飯，有別於其他飯，佢個滑蛋淋係豬扒周圍，蛋汁比例較多，飯則另上並唔係撈埋一齊，咁樣塊豬扒就唔會好快就淋哂，keep得住香脆既表皮。高木串燒岀名，所以都叫左幾串串燒試下，雞翼燒到香噴噴，味道鹹香。茄子更加香濃，索哂燒汁，所以好食。燒冬菇都好味，表面燒得很好，亦都好入味。可惜最期待既帶子就麻麻地，燒得過熟，咬好耐先咬得到。