翠華餐廳 (Closed)

八號風球懸掛下，走出街，睇吓有咩嘢食。好多茶餐廳都有開，諗緊去邊間好，見到翠華都有開，走去食個奶油豬。叫咗個奶油豬同一杯凍奶茶，仲叫多個淨片頭加墨魚丸。奶茶先到，一貫水準，有茶味但唔夠香，唔滑、唔澀。再來奶油豬，一見已經心動，飽邊少少焦，牛油及煉奶嘅份量都唔少；一啖咬落去，感覺到豬仔飽嘅脆皮，入口扑扑聲，脆而不硬，飽心又軟熟，呈微暖，一脆一軟，非常好食；加上牛油同煉奶嘅味道，簡直係人間美食，難得嘅係，翠華絕對唔會慳皮，牛油係塗滿成個豬仔飽，煉奶亦都落足份量，每一啖都可以食到牛油同煉奶嘅味道，正！食完嗰飽，就食嗰碗淨片頭加墨魚丸，先呷一啖湯，依然係魚湯湯底，帶有少少胡椒味，再加埋d蔥花，完全食唔到魚腥味；再食塊魚片頭，唔油膩，彈牙爽口，好食；再食粒墨魚丸，細細粒，唔韌，但唔夠爽，唔夠彈牙，及唔上一般潮州粉麵舖。埋單$60，以翠華嘅名氣，當然唔算貴，但食物嘅質素，應該有空間改善。