Mad for Garlic (Closed)

以前翻工成日去又一城，食來食去都係個幾間，終於有新餐廳喇！終要係用蒜頭做主題既餐廳，我呢個蒜精梗係要試試。因為餐廳用半開放式設計，出面已經聞到好香好香蒜味。好在早到，等左一陣就有位喇。今日唔算太肚餓，同朋友要左2樣食物，首先黎個入門蒜級既蒜香帶子香草忌廉菠菜麵。如果唔連炸過既蒜片食，其實好少蒜味，反而香草味比較重，而且帶少少酸，應該係檸檬汁，令醬汁冇咁heavy。意粉係闊條麵，可以黏到更多醬汁。帶子係刺身級，煎到半生熟，剛剛好。其中一個招牌菜，熱板烤肉眼扒配蒜頭山。呢個真係冇形容錯，d蒜頭多到成座山咁，除左炸到脆脆的蒜片，仲有一堆蒜泥。雖然係咁多蒜頭，但單食牛排既時候都唔會話無牛肉味，肉汁依然存在。本來要左5成熟，但店員提醒我地鐵板會保持熱力，所以上菜會再熟多少少，所以要左3成，黎到就剛剛好。呢間餐廳一定要同朋友先好食，如果唔係食完後d口氣真係會嚇走人，哈哈！