川粵米線大王 (Closed)

一次偶然機會試咗就好似上咗癮咁。我住附近，平時食開對面既洽興，貪佢夠平。見呢間米線啱啱開檔，响出面見到價錢都唔算貴，咪入去試吓新野。第一個感覺係有啲多餘既半自助形色：要人寫點菜紙，又唔係乜大酒樓．．．直接同佢講食乜好過啦。食咗幾次都慣咗。第二係食飯時間好旺，一個人就點都要搭枱，同埋叫咗野有排都未有得食。所以我通常都係响一點前去。夜晚仲誇張，幾十人响門口等位。佢啲米線麻味好正，响等二度我都未試過。啲湯度有啲黑色外形似胡椒粒既，一咬落去成口麻痺。好過癮。仲有食完之後好似上腦咁，個頭涼沈沈，對於我地呢啲返ｏｆｆｉｃｅ既成日做到頭痛係一大享受。我亦都試過其他米線，人地啲係用辣椒粉而呢度係辣椒油。我由微辣食到中辣，都好似唔係好夠辣咁。佢地既辣油係自家制，加咗大量辣椒皮，同埋好香，同時滿足人既味覺同嗅覺。食過佢啲米線之後，直頭對對面間洽興無灑興趣。因為湯底、餸料同麵線都相差太遠。雖然價錢方面係貴啲，但係計埋份量同質量，真係好值得。仲有佢有個午市特價，叫米線送野飲。兩個餸既米線連野飲都係hkd21落樓。