五斗米 (厚和街) (Closed)

前排先食完台灣菜，今日又黎左呢間台式小店【五斗米】，Menu上有唔少地道小吃，感覺幾有台灣風味；而且價錢相宜，試多幾款都唔會肉赤。《原汁牛肉麵 $60》可以揀細麵或者加錢轉刀削麵，最後要左細麵，湯底濃郁但少左d牛味，反而牛肉整得唔錯，肉質腍滑有膠質，麵身有咬口，加d辣會更惹味。《肉燥乾拌飯 $55》配料豐富，有肉燥、肉丸、津白、滷蛋，米飯煙韌，配咸香味重的肉燥送飯一流，津白多汁鮮甜，肉丸有d乾左少少。《玉米起司蛋餅 $38》外皮香脆，裏面包住半溶的芝士同粟米，又甜又咸幾好食。《鹽酥雞 $30》呢個價錢真係好抵食，雞肉好多汁，調味同其他店有少許不同，真係有少少台灣夜市味道，幾有驚喜。《九份芋圓 $32》有番薯、芋頭兩種芋圓，份量好足料，口感煙韌，糖水亦唔會過甜，可以一試。《蜂蜜檸檬愛玉 $23、烏梅汁 $18》蜂蜜檸檬配搭愛玉真係好夾，酸甜味道，口感Q彈滑溜。朋友的烏梅汁亦不錯，有d似古早味酸梅湯，爽涼解渴。