Video
Read full review
2022-08-18
1078 views
實力派三星米芝蓮法國菜是次人均消費：$1200總結：我已經想去encore了🥹————————————————————————特登夜晚捕住部電腦終於都book到呢間連續攞左十一年米芝蓮三星嘅法國菜餐廳. Book 左比較signature嘅bar枱位，原來bar枱位會有一份small tasting portion menu，啱哂鍾意試新野但又唔大胃口嘅我地. 我地兩個人揀左一個4-courses lunch另外再喺small portion menu揀幾款單點.餐前開胃菜有麵包籃同凍湯 - 每個麵包都係的骰size，好香牛油味，食唔哂可以打包番屋企. 另外蕃茄士多啤梨凍湯伴茅屋芝士雪糕，頭兩啖係酸甜開胃，不過個人覺得食到中段有啲膩.AppetizerLe Caviar Royal - 面層係椰菜花忌廉，中間有龍蝦啫喱然後底層有魚子醬. 一入口有椰菜花清香，伴隨香濃嘅龍蝦啫喱同埋鹹香嘅魚子醬，每一啖都係海洋嘅味道. 非常有層次而且配搭好平衡，唔會有格格不入嘅感覺.La Langouste - Rock lobster salad. 呢款沙律用左澳洲rock lobster，比較有咬
實力派三星米芝蓮法國菜
是次人均消費：$1200
總結：我已經想去encore了🥹
————————————————————————
特登夜晚捕住部電腦終於都book到呢間連續攞左十一年米芝蓮三星嘅法國菜餐廳. Book 左比較signature嘅bar枱位，原來bar枱位會有一份small tasting portion menu，啱哂鍾意試新野但又唔大胃口嘅我地.
我地兩個人揀左一個4-courses lunch另外再喺small portion menu揀幾款單點.
餐前開胃菜有麵包籃同凍湯 - 每個麵包都係的骰size，好香牛油味，食唔哂可以打包番屋企. 另外蕃茄士多啤梨凍湯伴茅屋芝士雪糕，頭兩啖係酸甜開胃，不過個人覺得食到中段有啲膩.
Appetizer
Le Caviar Royal - 面層係椰菜花忌廉，中間有龍蝦啫喱然後底層有魚子醬. 一入口有椰菜花清香，伴隨香濃嘅龍蝦啫喱同埋鹹香嘅魚子醬，每一啖都係海洋嘅味道. 非常有層次而且配搭好平衡，唔會有格格不入嘅感覺.
La Langouste - Rock lobster salad. 呢款沙律用左澳洲rock lobster，比較有咬口. 底層嘅蘋果同蔬菜粒好清新，面層嘅黑松露就冇乜特別作用. 整體黎講都係好食嘅，但就唔係會令人印象深刻.
Soup
Le Crustaces 龍蝦馬賽魚湯伴脆炸蝦球 - 另一個海洋😂 非常濃郁嘅濃蝦湯，入面有啲龍蝦肉粒. Texture唔會好厚但味道好濃厚，個人覺得如果有番啲鮮甜就會有咁易覺得膩. 粒蝦球就有啲不明所以.😂😂
Main
Les Spaghettis 龍蝦意粉 - Chef另上一個比較creamy嘅龍蝦汁. 意粉煮得al dente，如果就咁食就會有啲油，個人比較鍾意加埋龍蝦汁之後嘅配搭. 龍蝦肉係完美，好鮮甜，外面熟而中間半生熟，好嫩滑. 越食越肚餓.🥹
Le Caille 鵝肝釀走地鵪鶉 - 一道令人驚艷嘅菜. 鵝肝香滑又唔會油膩，鵪鶉胸煮到粉紅色勁嫩滑，同鵝肝嘅口感配合得好好，兩者好似融為一體咁. 冇多餘嘅調味，只有牛油蒜香同雞油菌嘅香味. 食完都覺得唔夠喉.🥹🥹🥹
薯蓉 - 每個肉類或海鮮類嘅main 都會有呢度嘅名物薯蓉做配菜 - 侍應介紹果陣話呢個薯蓉係用左好多牛油，所以太熱或者太凍都會影響到佢嘅口感. 呢個薯蓉口感綿密，好似食緊gelato咁，有牛油香之餘又會有啲薯仔嘅甜味，好好味.🥹🥹🥹
Dessert
Le Chocolat - 面層有朱古力，裡面有朱古力crumbs，朱古力mousse，hazelnuts 同埋伯爵茶味嘅雪糕. 朱古力唔會好甜，清新嘅伯爵茶味雪糕中和左朱古力嘅膩. Hazelnut 好香脆而且冇一般nuts果種油味.
Le Soufflé- 完美嘅朱古力梳乎厘，首先個樣已經勁靚高質，升得好靚. 外脆內濕潤，口感輕盈而又唔會好似食空氣咁.香濃嘅朱古力味. 底部仲有啲朱古力脆脆增加口感. 一個人ko一個冇難度.
最後嘅petite four係焦糖味Macaron 同埋朱古力. 特別想提下佢地隨咖啡而上嘅自家製焦糖醬，加左brandy，香到癲左！
今次喺L'Atelier de Joel Robuchon嘅用餐體驗非常好，服務細心但唔會有壓迫感. 知道我地想share都會自動波想啲野食分做兩份. 坐bar counter可以睇到廚房嘅運作，賞心悅目. 唯一要挑剔嘅係啲餐具可以renew下.
******************************
L'Atelier de Joël Robuchon (中環)
中環皇后大道中15號置地廣場4樓401號舖
Post
