泛后甜品 (Closed)

食完葡國菜之後，就行左過黎呢度食糖水。望住一個幾乎可以背得到既餐牌，完全真係無頭緒去諗食乜野好。因為款式次次都係咁上下，唔係呢樣就果樣。我又唔想個小二等我地咁耐，都係食雪糕涼粉呢類無難度之作。而家人就食另外兩款甜品。雪糕涼粉呢類無難度之作，真係幾難整得唔好食。標準製作既雲呢拿雪糕再加上罐頭涼粉，呢個配搭當真唔錯，絕少有失手既機會。涼粉雖然係罐頭貨色，不過做到我要既爽口，已經算唔錯。等雪糕慢慢咁溶，再加涼粉食，真係唔錯既。黑白有滑白色既係大豆布丁，彈下彈下好可愛架。而且豆味好夠，唔錯唔錯。而黑色既係芝麻，黑同白撈埋一齊。味道都幾夾，芝麻同豆既味道又唔會俾豆或者芝麻獨佔。整體上，個甜品都算幾有新意既。楊枝甘露表面睇味道應該唔錯，不過我對芒果既興趣唔太大。所以無乜咁食，因此不作特別既評論。整體上都中規中矩，價錢都算合理。食物上既效率都幾高，只不過每次見到似曾相識既餐牌。真係諗唔到食乜野糖水。