薈萃軒 (Moved) New Location

第一次幫襯呢一間私房菜，我哋一行18人被安排一間獨立房間，地方好寬敞，房間內有兩部電視機可以欣賞電視節目。今次我哋預定係套餐D，連埋生果一共11道菜。首先上咗個蟹肉海皇翅，翅不是很多，不要期望太高。之後再嚟過金銀粉絲蒸元貝，粉絲略為硬咗啲，接着就係冬菇花參燴鮑魚丶黃金大蝦，水準即刻返晒嚟。芝士焗龍蝦嘅芝士更更滿瀉，鍾意食芝士嘅人一定開心到跳起。去到呢一碟菜，已經飽到郁唔到，再嚟薑蔥炒蟹清蒸石斑一個好似大帽山咁高嘅炒飯，大家見到即刻舉手叫侍應＂唔該三個飯盒＂🤣，最後再嚟個椰子燕窩和哈密瓜，大家食到舔舔脷。總括呢間私房菜環境不錯，食物性價比高，美中不足是不可大聲喧嘩，畢竟樓上樓下是住宅，擔心會俾人投訴，所以大家講嘢都就住就住，下次會再嚟幫襯。