孟買廚房 (Closed)

聽講幾百個喺武漢返黎嘅印度人冇一個中招，消息一出，大家對究竟係咖哩定恆河水有咁大威力都好有興趣，先不論兩者有冇如此神奇工效，但西方節日揀食印度菜就實冇死，所以今年情人節正日我地就揀左黎孟買廚房。唔知係情人節關係，定大家真係想試下咖哩係咪真係可以抗肺炎，雖然孟買廚房喺九龍城邊陲，但七點未夠都已經坐滿人。而小店裝潢其實唔似一般印度餐館，反而同普通西餐廳差唔多，比較四正同新淨，但價錢又冇特別貴，大部份菜式都係幾十蚊有交易，人均百零二百蚊已經食到飽。椰子水($45)椰青大大個夠兩個人飲，好清甜，食咖哩時用解辣就最啱，而且椰青肉仲好嫩，好容易盲挖倒出黎。蒜烤餅($22)一份有三大塊，蒜味唔算好重，烤餅軟熟唔會太乾。巴辣咖哩雞($75)聽個名會以為係同啃他雞有關係，其實係辣度比較高嘅咖哩雞，佢比一般瑪沙拉辣，但食開三小辣嘅我唔會覺得辣得好辛苦，幾惹味。如果食得辣嘅可以同侍應講整返辣啲。甜奶茶($40)哩個係一個好出名嘅印度甜品，係將牛奶、糖同香料整成嘅奶湯圓浸喺甜奶入面，再加入果仁碎。甜湯圓口感有啲似椰絲，有少少香草味，甜奶就有啲融化左嘅雪糕又或者吉士醬，特別得黎亦容易令香港人接受。總結，食物不俗