夢の丼 (Closed)

冇得去日本，唯有食日本餐止止癢。呢間聽聞咗好耐，第一次食，最驚為天人就係佢啲丼飯餸多過飯，花錦魚生丼比我想像中有誠意好多，一般日本餐廳嘅雜錦只會比cheap嘢，呢間竟然有三文魚子，有蟹肉，成本價好高喎，我哋鍾意食三文魚，二重親子丼有生有熟，份量都幾大，最好share嚟食，太飽會食唔到其他嘢。我亦都好欣賞呢度嘅小食，試咗個蟹膏豆腐，喺出面好難食到呢種口感同味道嘅食物，感覺新鮮，如果嫌海膽太貴，我覺得呢個蟹膏豆腐都會比到你有食海膽嘅感覺。如果平時食開帆立貝刺身，磯燒帆立貝都係一個新鮮嘅選擇，另外叫咗啲刺身分別係深海池魚同埋伊佐木，都非常新鮮，建議大家到時問一下侍應當日供應，確保可以食到全場最新鮮嘅刺身。左口魚邊壽司超好食，味道同個口感好驚喜，唔係一般刺身壽司嘅口感，鍾意食濃味嘢嘅人會鍾意嘅。小貼士，記得要訂位，今日係星期四，晚上7點座無虛席，呢個人流絕對反映到呢度食物嘅水準。見到啲下午套餐都只係$98 ，有機會真係要過嚟試吓！