中村藤吉 (Closed)

今日星期五襯放假一早9:50去THE ONE排隊試中村，去到二樓LIFT大堂發現已經有人排隊，心諗已經排到落嚟，今次都唔知食唔食到？不過問過排隊D人先知10:00前18樓個LIFT門係唔會開，所以大家到都喺二樓大座等，踏正10:00即刻上去排隊，今日小弟就排到第四位。等到11:00點終於等到LA，同朋友總共點咗3樣甜品：蕨餅由一層甜甜地的綠茶粉包住，口感QQ唔痴牙，配上一紅一綠甜醬汁，最重要係限量5份，試問有咩人可以抗拒到限量呢兩個字，真係要一早嚟排先食得到。抺茶啫喱凍凍地好清新，配埋D雪糕真係好啱夏天食，最重要係小圓子新鮮唔會好粉。抺茶芭菲係我三樣食品中最愛，佢入面有Cream、綠茶蛋糕、綠茶雪糕、小圓子、紅豆、甘栗、綠茶啫喱，每樣嘢都夾得幾好，賣相又靚，最重要係咩都可以食少少。總結今日嘅等待係值得，雖然份量都幾足，但兩個人最後都食得哂3樣甜品。不過建議可以試下個冷面，因為我都見到旁邊幾多人點呢樣嘢，而且食D咸嘢會令你食甜品食得更美味。