Sweets House Cha Cha

Open Now

Now Closed

好耐之前已經聽過人話呢間d抹茶甜品好好食，呢日放工經過海港城又有d肚餓，於是專登去買嚟食。既然抹茶最出名，當然要由抹茶嘅甜點試起。間店分為三部分，一間賣雪糕，一間賣泡芙，一間賣大判燒。落咗單要去收銀台俾錢先。海港城好多遊客，所以可能要排隊等一陣，去雪糕嗰邊俾八達通就快啲。呢日買咗個抹茶吉士紅豆大判燒，拎上手暖但唔熱。入面嘅抹茶吉士好幼滑好有茶味，唔會太甜，不過我覺得唔係好夠紅豆，對嗜甜嘅我嚟講有啲不足。可能因為我嗰日一路食一路喺街上行去搭車，所以有啲食而不知其味。幾日後自己一個放工又肚餓，於是諗住再去買大判燒同泡芙做晚餐。晚餐只食甜品怪怪地，於是買咗個芝士火腿大判燒。拎上手仲係熱辣辣！咬第一啖未啖到入心，再咬就食到好香濃拉到絲嘅芝士！大判燒個皮仲加咗黑椒，食落更加惹味！火腿就食唔出特別，不過成個配搭都好match！食完晚餐再買多個甜品：吉士泡芙！唔同大判燒，泡芙拎上手凍嘅，咬落口個皮幾脆，入面注滿用云尼拿籽做嘅吉士，香甜幼滑，加埋脆脆嘅泡芙皮，口感好match！試咗三個產品，覺得泡芙係最好食嘅，下次要再試抹茶泡芙！