MUM 日常野菜料理 (Closed)

星期六嘅下午自己一個食飯，拎住好多嘢，想搵間唔洗等又坐得舒服嘅餐廳，諗諗下就諗起逸東Canteen。到埗發現我都幾錯，因為都幾Full吓，不過總算搵到位，就試下MUM 日常野菜料理。佢都幾似素食版MUJI， Menu分熱盤同冷盤，可以叫幾個餸，都係賣健康飲食，俾人感覺都好乾淨。值得一提，佢份量唔算多，大食嘅可能會唔夠。我當日嘅午餐南瓜薯餅，好高質，一啲都唔油，應該係即炸嘅關係，南瓜味好濃好香，加埋少少沙律醬，酸酸咁，諗返起都想再食。Highlyrecommended!茶杯蒸，呢個都好好味，佢同平時食茶杯蒸嘅高湯一樣咁香，估唔到素菜可以做到魚或者雞咁嘅高湯味，蛋又蒸得滑。柚子醋蕃茄（冷盤），食得出柚子味。不過比起熱盤就有點失色。叫咗黃薑飯，食完覺得健康咗，笑～