Saravanaa Bhavan (Moved) New Location

呢日同個friend落老尖shopping,行到咁上下又係食晏時間，佢話带我試吓新口味…印度素食，咁我哋就嚟咗呢間座落喺雅士尼中心4樓嘅Savannah Bhavan。有别於一般食肆，打開大門做生意嘅風格，我哋搭𨋢上度嚟，見到一個寫滿印度文嘅水牌，跟住推開道平平無奇嘅木門，先至見到間餐廳。沒有我想像中一般印度食肆别饒傳統風味嘅華麗佈置，反而像踏足一間平民食堂。只見四周食客都係印度人，咁反而增添我對呢度嘅食物嘅信心，因為一定夠地道。天口咁熱，先來杯石榴汁消消暑氣，現搾現飲，少少甜冇加糖，夠新鮮，夠健康。跟住嚟個小食：蔬菜咖喱角，咖喱角主要餡料係青豆同香料薯仔，一啖咬落外皮酥脆，再沾一沾酸甜醬同香草薄荷醬，豐富口味前所未有。再上嘅腰果炒飯，係用印度香米配金黄嘅炸腰果再加上印度香料炒成，炒飯帶少許微辣，不過非常可口，再配上加咗青瓜同紅洋葱嘅乳酪汁，好味層次又再提升。啱啱烘好嘅洋葱烤包熱辣辣上枱，食落煙煙韌韌，包入面有新鮮嘅紫洋葱同香草，口味夠晒清新。估唔到印度素食都有咁多選擇同口味，下次嚟一定要叫多幾款唔同嘅菜式。