碗盛 (Closed)

上次喺天后食飯已經留意到依間喺清風街別樹一格、日系裝修嘅碗盛－今次適逢午市有唔少丼飯同日式西餐等嘅選擇，一於試一試😋午市套餐包餐湯、沙律、小食，麵豉湯正常發揮，和風沙律有油醋汁外仲落咗少許黑胡椒同七味粉，冇咁單調。小食揀咗炸餃子同炸芝士－餃子餡有胸軟骨，咬落脆口幾得意；一口芝士就用咗金文拔芝士，唔係拉絲而係軟滑creamy咁嘅，我幾鍾意呢！嚟到主食蒲燒鰻魚飯，原條上夠wow！平時覺得鰻魚飯好難會唔好食，不過餐廳亦冇馬虎，鰻魚邊燒得脆脆地，上面鋪上紫菜木魚絲，下面就墊住蛋絲，另外附上蒲燒醬汁可以自由添加，食晒啲飯仲有好大舊鰻魚可以慢慢食～天使麵除咗兩隻蟹鉗外仲混咗蟹肉蟹籽喺裏面，加上味道較重嘅蘆筍、蒜片、紫洋蔥同蕃紅花，雖然湯汁未算濃但都夠味。巨峰梳打、乳酸梳打加咗冰所以唔會太甜，解渴啱晒～順帶一提餐廳入面幾多卡位，疫情下想出去食都係一個比較放心嘅選擇👍🏻