金鳳大餐廳 (晴朗商場)

Open Now

Now Closed

喺大角咀讀書嘅年代，已經鍾意幫襯金鳳，時至今日已經開咗好幾間分店，今日就幫襯吓屋企附近嘅金鳳大餐廳。最鍾意幫襯呢度嘅港式西餐，先嚟個暖笠笠嘅餐包，溫度啱啱好唔會過熱，又可以將牛油溶化喺麵包入面。忌廉湯每日都有少少唔同主題，今日就配有火腿粒，味道濃郁。今晚其中一個餐我哋選擇咗每月特選晚餐，配有日式鰻魚薯仔沙律，雖然配搭有啲獨特，不過各自各精彩，兩款都咁好味。嚟金鳳當然係為咗食佢嘅吱吱聲鐵板餐，有黑椒汁或者蒜蓉汁俾你選擇。我哋另外揀咗主餐牌上嘅帶子牛柳餐，兩粒帶子兩邊快煎一下，然後再淋上熱辣辣嘅牛扒汁，令生熟度控制得剛剛好。牛柳夠晒嫩滑，配搭埋蔬菜同薯條真係冇得彈。特選晚餐係鐵板西冷牛扒拼司華力腸，小朋友就最鍾意，而且份量多到真係食唔晒。飲品，我哋都選擇咗配特飲，紅牛係利賓納梳打配士多啤梨雪糕。黃牛就係忌廉汽水配芒果雪糕。特選套餐仲包咗一球指定口味意大利配方雪糕，今日就係綠茶味，夠晒香滑。