餃子縣餃子專門店 (Closed)

之前係屯門個間餃子縣食過兩次，個時餐牌都有轉過，但味道一樣咁好味，今次係旺角行街，行行下竟然見到餃子縣係旺角開左分店！ 見到門口既餐廳都已經忍唔住拉左男朋友入去食！我地好肚餓，所以一黎就叫左個擔擔麵兩個人share. 呢到既擔擔麵我係第一次試，一上菜就有好香既花生味，係擔擔麵獨有既特色，但個汁一d都唔杰撻撻，反而濃淡適中，每啖都可以包住d麵咁入口，好味！餃子叫左黑松露芝士餃，津白餃子，紫菜餃子同埋白菜餃，全部都轉左做冰花煎餃，全部上到黎都煎得金黃，無燶啊！ 好勁！津白煎餃同白菜煎餃就係傳統個隻餃子，菜同肉既比例岩岩好，肉味唔會搶左菜既香味同清新既感覺紫菜煎餃我要特別推介！ 成隻餃子一咬落去d紫菜味就飄哂出黎，望入去，成隻餃都有啊！ 呢款係創新餃，我暫時未係其他地方食過，食過翻尋味！最後係我最鍾意既黑松露芝士煎餃，咬開d汁已經流哂出黎，要吸返啊，黑松露味好重，啖啖都有食到，芝士唔會太多，岩岩帶起左個口感出黎，流質既芝士唔會令到食落膩，我一個人就食左4隻，留左一隻比男朋友咋haha