十二味 (山市樓) (Closed)

大少同我繼續食在堅尼地城，但唔再係厚和街lu. 堅尼地城其實冇乜邊間食店要等位。估唔到呢間食店咁多人，我哋12:45去到竟然要等位。等左大約5分鐘，終於有位座。大少叫咗口水雞，我就叫咗魚湯泡飯。大少個餐好快就到，口水雞份量都唔少，配一碗白飯仲有蒜頭雲耳做前菜，而餐飲就改咗做哈密瓜鮮奶。雖然叫做川式口水雞，碟雞上面亦都有好多辣椒油，但係食落去一啲都唔辣。就算唔食辣嘅人都可以一試。再試埋大少個哈密瓜鮮奶，個奶味好重，唔係奶水但係應該加咗糖漿，因為個甜度比正常哈蜜瓜甜。但係我個魚湯泡飯就等得耐啦、我估10至15分鐘，每次問服務姐姐有冇落漏單，佢哋 check 都唔 check,只係講整緊啦。三催四請之下我個魚湯泡飯終於到啦。泡飯裏面除咗有碎魚粒，仲有青瓜粒，蓮藕粒同埋海帶粒。個魚湯都好白，亦都唔腥。個泡飯冇乜特別，同平時啲魚湯泡飯差唔多，比起大少嘅口水雞，我覺得佢嗰個吸引啲。我個餐飲就要咗桂花冰釀，味道同食桂花丸子一樣，只不過呢杯嘢飲將甜品變成餐飲。哩間店舖食物一流但係服務真係九流，食物真係唔差，所以大少已經講應該有翻兜機會。