老鍋台式火鍋 (Closed)

好少寫食評但今次真係有感而發，好耐無去幾乎每個職員都無禮貌既餐廳。首先，今次係因為有折扣先試呢間原本系我心目中overpriced 既餐廳，去到原來海鮮類無折扣（通常淨係飲品甜品無）唔緊要，但落單時staff完全無mention，海鮮類又係連埋其他食物系同一頁餐牌度，去到埋單先知無折真係覺得唔係好專業，有種俾人「陰」既感覺。跟住食到咁上下發現有兩碟食物漏單，提完職員再等一輪先送食物黎，啲食物黎到無耐，就有職員話差唔多夠鐘叫我地埋單先，埋完之後，啲職員係咁行來行去望我地，甚至企係我地隔離定睛望，感覺真係好唔舒服，過多幾分鐘職員直頭行過黎話夠鐘，叫我地走，我望住果兩碟之前漏左單啱啱送上黎無耐既生肉，再望下個職員，我真係呆左。如果間餐廳已經坐滿好忙我都比較可以理解，但當時入座率極低，基本上放眼望去除左我地係得1/2枱，咁既情況下，我真係覺得職員態度好差。老實講，無論係價錢、環境、食物質素、員工態度，同類型既養心殿都優勝好多，想食台式火鍋又俾得起呢個價錢真係無必要黎呢間餐廳受氣。