Video
Read full review
2012-09-20
345 views
響西環住左大半年，食黎食去果三、四間粥粉麵飯，尋日第一次想行遠 D 搵食，就試下呢間潮州粉麵舖。幫襯後決定寫篇食評讚下佢（雖然我完全冇影相）。今次亦係我第一次寫食評，希望推介倒正野畀大家。本身我想睇下貴唔貴先決定係咪幫襯，但響店舖門口果幾個大型餐牌度都搵唔倒價錢。而且都係粥 ge 資料多，有咩麵就唔係好睇倒。我行完左、再行右、再行去左，最後唔好意思齋睇唔買，就入左去坐喇。坐低之後我都仲望緊有咩食、幾多錢等資料，有兩個遲過我入去 ge 客人都點左菜喇，於是到我想點野食 ge 時候，個嬸嬸店員就忙住話畀廚房知 D 柯打。反正我唔趕時間，就諗住等佢得閒先再落柯打，點知呢個時候另一個嬸嬸（可能係老闆娘？）就開口提佢：「個靚女叫左野食未？」佢就即刻由廚房行返出黎問：「靚女想食咩？」果刻我真係心中佩服：「嘩！真係好識做生意，係唔係都讚靚女！仲好有禮貌……」通常其他舖只會問句「阿姐要咩呀」ga 咋！叫左兩樣食物：牛肚河（少河粉）、芥蘭（湯上）等待 ge 期間，睇下周圍環境。呢間舖四分之一地方係廚房，仲有兩個廁所，其實都霸左唔少位。成個場得八張檯，有幾張係逼逼地，不過好在大家都快食快走。衛生情況我覺得
本身我想睇下貴唔貴先決定係咪幫襯，但響店舖門口果幾個大型餐牌度都搵唔倒價錢。而且都係粥 ge 資料多，有咩麵就唔係好睇倒。我行完左、再行右、再行去左，最後唔好意思齋睇唔買，就入左去坐喇。坐低之後我都仲望緊有咩食、幾多錢等資料，有兩個遲過我入去 ge 客人都點左菜喇，於是到我想點野食 ge 時候，個嬸嬸店員就忙住話畀廚房知 D 柯打。
反正我唔趕時間，就諗住等佢得閒先再落柯打，點知呢個時候另一個嬸嬸（可能係老闆娘？）就開口提佢：「個靚女叫左野食未？」佢就即刻由廚房行返出黎問：「靚女想食咩？」果刻我真係心中佩服：「嘩！真係好識做生意，係唔係都讚靚女！仲好有禮貌……」通常其他舖只會問句「阿姐要咩呀」ga 咋！
叫左兩樣食物：牛肚河（少河粉）、芥蘭（湯上）
等待 ge 期間，睇下周圍環境。呢間舖四分之一地方係廚房，仲有兩個廁所，其實都霸左唔少位。成個場得八張檯，有幾張係逼逼地，不過好在大家都快食快走。衛生情況我覺得已經唔錯，只係每次有人出入廁所就會有一隻烏蠅飛出來（我坐響近廁所位所以都間中要揮揮手趕走佢，好在得一隻。
過左唔係好耐，野食黎喇！兩款都熱辣辣，真係出哂煙咁 ga……
牛肚河（少河粉）
有五塊牛肚，都算係大件。河粉係幼身 ge，我覺得已經算係滑。加埋佢有唔少蔥花，我覺得真係唔小器喎，依家好多餐廳都介意畀多兩粒蔥畀客人，仲會同個客講：「依家蔥仲貴過菜呀！」跟住我想搵下檯面除左辣椒油之外，有冇炒蒜粒可以放落個粉度，疑似老闆娘真係一眼關七，即刻問我搵咩？我答完佢之後，佢話：「呢度冇喎！」咁我就諗算啦，都知唔係一定有，但轉頭佢入廚房拎左一小碟炒蒜粒出黎畀我！！！
芥蘭（湯上）
初時我見倒碗芥蘭，真係有 D 驚佢仲未熟，因為面頭有幾條粗的菜頭，所以我食粉食到咁上下先夾菜食，希望用湯浸耐 D 先。但係，一食落去，我覺得真係好正喎！唔單止唔生，裡面都冇起根，個心仲係甜 ga！而且成碗菜都係大條的菜頭或菜葉，得兩粒唔食得 ge 菜花，唔會成堆都係細葉同菜花，真係良心品質。
Other Info. :
留意左一陣，我發現呢間舖 ge 員工畀倒客人好舒服 ge 感覺（當然唔係只因佢讚我靚同埋醒我一碟蒜粒啦:P），因為 D 員工係默默耕耘果種人，冇強逼、唔計較、對客人亦細心，有好多例子 ga：
1. 我響出面行來行去時，佢唔會 chur 我問「幾多位呀？入黎坐啦！」
2. 冇 chur 過客人落柯打，個個入到黎都可以坐定定（有 D 人仲坐完一張又一張，不停揀凳仔）先慢慢叫野食。
3. 有兩個講英文 ge 華人（我估係韓國人）入左舖頭，一個不停教另一個認中文字，佢地都好有耐性，亦唔會走去加把口話「試呢個啦！呢個好食。」
4. 兩個疑似韓國人話完叫 take away 又轉堂食，另一女士中途改柯打由雙丸變四寶；兩個嬸嬸同埋廚房兩位叔叔都冇出過聲話人。
5. 有對夫婦，太太應該係有左 BB，叫左一碗加底墨丸粉，佢地就畀定個碗仔同匙羹畀客人。
6. 有個客話想要多花生，即刻畀。
……
坐低食碗粉咁短 ge 時間都見倒佢地咁好咁對客人，所以真係唔畀笑臉佢地都唔得。:)
(The above review is the personal opinion of a user which does not represent OpenRice's point of view.)
Post