尚鮮海鮮料理 (Closed)

同朋友聚舊，咁啱都係邊爐迷，就黎咗依間評價唔錯嘅尚鮮。裝飾得好似日本餐廳，有卡位有房有普通位，揀咗卡位，因為竟然有獨立電視睇。侍應都好用心咁同我地介紹唔同選擇，最後我地決定散叫。湯底係鮮牛肝菌昆布湯($108)，有唔同種類嘅菇，鮮味十足，清清地唔算太濃，好啱同海鮮打邊爐。手切牛邊位($198)，紋理清晰，薄身，淥幾秒就熟透，好重牛肉味，非常鮮甜。松皇蟹皇餃($108)，睇賣相以為係平平無奇嘅餃子，撈番上黎一咬就有濃濃嘅蟹膏味，見到好多蟹膏混埋豬肉一齊包，好正！鮮打四寶丸($78)，係牛、豬、墨、蝦丸，每款各2粒。口感扎實，手打得唔錯，而且冇魚目混珠，係用十足十嘅材料黎打。手打墨魚滑($78)，上面灑咗黑松露。侍應服務周到，主動上前幫我地”筆”落邊爐到。墨魚滑爽口，沾上牛肝菌味後更加突出鮮味。羽衣甘藍($38)，平時食沙律就食得多，估唔到可以用黎打邊爐。侍應話要好像打粟米咁樣放耐啲先好食，果然索哂湯底之後淋淋地，好惹味。飲品方面，見到有自家製嘅洛神花蜜茶($26)同埋青檸梳打蜜($26)，一於試下先。洛神花茶，有淡淡嘅香氣，而青檸梳打酸酸甜甜，解渴一流。原來逢星期五六日，會有新鮮刺身直送